Arboj de moderaj kaj malvarmaj regionoj/Arboj kun korformaj folioj

Leciono B-4: Tri arboj kun korformaj aŭ rondaj folioj

Arboj kun korformaj aŭ rondaj folioj, same kiel arboj kun manformaj folioj, ne estas scienca grupo: malsamaj specioj de arboj de la sama familio, eĉ de la sama genro, povas havi ĉu korformajn/rondajn ĉu aliformajn foliojn. La lernanto sciu ke tiu ĉi atentigo estas aplikenda en preskaŭ ĉiuj venontaj lecionoj, kvankam ni rememorigos pri ĝi nur kelkfoje.

Folioj de tilio (Tilia cordata)

En tiu ĉi leciono ni pritraktos la sekvantajn specojn de folioj:

• korformaj
• triangulaj
• rondaj
• rombaj

Ne estas ĉiam klaraj limoj inter tiuj formoj. Fakte, rondaj kaj rombaj povas simili al la plej ofta formo de arbaj folioj, t.e. elipsa aŭ ovoforma. Sed ne zorgu: ĉio estos klare, kiam vi havas antaŭ vi arbon!

Jen la tri arboj kiujn ni elektis por tiu ĉi leciono:

• B-4/1 → Tilioj (klara ekzemplo de korformaj folioj)
• B-4/2 → Cercidoj (klara ekzemplo de rondaj folioj)
• B-4/3 -- → Poploj (pli malsimpla)

Ni konsilas ke vi legu ilin laŭ la supra ordo, sed se vi jam konas sufiĉe bone iun temon vi povas senĝene preterpasi al la sekva.